Sentralt i Sogn og Fjordane Jølster ligg midt i Sogn og Fjordane. Kommunen dekkjer eit areal på 671 kvadratkilometer. Av dette er 90 kvadratkilomter isbrear og 43,5 kvadratkilometer ferskvatn. Busetnaden i kommunen ligg rundt det ca 3 mil lange Jølstravatnet, i Stardalen som skjer inn mot Jostedalsbreen i aust, og vestover mot Moskog i Førde kommune. Jølster kommune har satsa på oppbygging av bustadfelt, skular og servicetilbod i dei to tettstadane Vassenden og Skei som er kommunesenteret. Kommunen har 2 skulekrinsar og 2 kyrkjesokn. Soknekyrkjene ligg på Ålhus og Helgheim. Ålhus sokn dekker den vestlege delen av kommunen medan Helgheim sokn er den austlege delen.
Frå Jølster er det kort veg til regionsenter både i Sunnfjord, Nordfjord og Sogn. Særleg viktig for kommunen er tilboda i Førde. Frå Vassenden er det kring 20 minutt køyretid og frå Skei er det ca 40 minutt. Elles er det frå Skei mellom 30 og 45 minutt både til Sandane i Gloppen kommune og til Sogndal.
Næringsliv Jølster er ein tradisjonsrik jordbrukskommune. Etter vestlandsmålestokk er bruka høvesvis lettdrivne og store. Næringa merkar nedgang men kommunen har framleis mange bygdelag med velstelte og godt drivne gardsbruk.
Kommunen har to senter, kommunesenteret Skei i aust og Vassenden i den vestlege delen av kommunen. Båe har tilbod som butikk, bank og post m.m.
Reiselivsnæringa har òg lange tradisjonar. Naturen og kulturen har, saman med den sentrale geografiske plasseringa gjort Jølster til eit attraktivt reisemål. Det er fleire kjende verksemder innan reiselivsnæringa. Særleg Audhild Viken Vevstove, Jølstraholmen Camping og Skei Hotell er godt kjende. I tillegg er det mange mindre verksemder innan turisme. Felleskjøpet har ei stor avdeling på Skei, som for få år sidan flytta inn i nybygg ved Skeibukta. Bygda har mange mindre verksemder, gjerne som supplement til jordbruksinntekt.
Det er ein felles arbeidsmarknad i Indre Sunnfjord. Dette gjer at utviklinga og tilboda i Førde er viktige også for Jølster.
